नीरज दइया री दस कवितावां


कवि नीरज दइया रा दोय कविता संग्रै "साख" अर "देसूंटो" प्रकासित नै चर्चित । राजस्थानी मांय संपादक रै रूप "नेगचार" सूं ओळख मिली अर पंजाबी कवयित्री अमृता प्रीतम अर हिंदी कथाकर निर्मल वर्मा री पोथ्या रा आप अनुवाद ई करिया । अकादमी अर दूजा मान सम्मान ई मिल्योड़ा ।आप राजस्थानी मांय पैली लघुकथावां लिखी अर संग्रै "भोर सूं आथण तांई" प्रकासित ई हुयो, पण आं दिनां कविता पछै आलोचना माथै खास ध्यान देय रैया है । पोथी "आलोचना रै आंगणै" छपण मतै ।
आं दिनां रैवास सूरतगढ़ (श्रीगंगानगर)  ।
ई-मेल : neerajdaiya@gmail.com


(1)

ओळख्यां अंधारो

डरै टाबर
अंधारै सूं
डरतो-डरतो सीखै
नीं डरणो ।

एक दिन
आवै ऐड़ो
धोळै दोफारां
टाबर ओळख लेवै
उजास में अंधारो ।

ओळख्यां अंधारो
टाबर-टाबर नीं रैवै
दबण लागै
भार सूं
करण लागै जुद्ध
अंधारै री मार सूं ।
***
(2)

हाकै में

म्हैं अठै
बरसां बाद बावड़ियो हूं
क्यूं चावूं देखणो
बो घर-गळी-आंगणो
कांई लेणो-देणो अबै
उण बीत्योड़ै बगत रै ऐनाणां सूं ।

बदळै बगत
स्सौ कीं हाफी-हाफी
तद नीं करै
मनां री गिनार ।

चोखो है भायला
थूं पोखै है कविता
इण हाकै में
परखै-पिछाणै पीड़
थारै जैड़ा रै ताण ई
साबत है
गैला-गूंगां रा सींग-पूछ ।

लोग कविता नै
गेला-गूंगा रा सींग-पूंछ समझै ।
***
(3)

थारै गयां पछै

जद-जद थारी आंख सूं
झरिया है आंसू
बां तांई
पूग्या ईज है हरमेस
म्हारी ओळूं रा हाथ ।

थनै उणां रो परस
हुवै का नीं हुवै
पण म्हैं सदीव उखणियो है
थारै आंसुवां रो भार !

थारी उडीक मांय
थारै पछै
कीं बाकी नीं है
थारै अणदीठ आंसुवां नै टाळ !
***
(4)

साख भरै सबद

दरद रै सागर मांय
म्हैं डूबूं-तिरूं
कोई नीं झालै-
महारो हाथ ।

म्हैं नीं चावूं
म्हारी पीड़ रा
बखाण
पूगै थां तांई
कै उण तांई ।

पण नीं है कारी
म्हारै दरद री
साख भरै-
म्हारो सबद-सबद ।
***
(5)

सबदां री नदी मांय

म्हैं अंवेरर राख्यो है
थारै दियोड़ो-
गुलाब ।

जद थूं दियो
म्हैं नीं जाणतो हो अरथ
उण नै लेवण रो ।

नीं जाणतो हो म्हैं
कै किणी रै ई पांती आ सकै है
अणजाण-अचाणचकै कदैई
कोई गुलाब ।

अबै थूं
म्हारै अंतस रै आंगणै
गुलाब रै उण फूल साथै जीवै है
अर म्हारै सबदां री नदी मांय
बैवै है उडीक साथै ।
***
(6)

घर

थूं अर म्हैं पाळ्यो
हजार-हजार रंगां रो
एक सुपनो ।

थारी अर म्हारी दीठ रो
थारै अर म्हारै सुपनां रो
एक घर हो
जिको अबै धरती माथै
कदैई नीं चिणीजैला ।

मा कैवै-
मूरखता है
घर थकां रिधरोही मांय हांडणो ।
बाळ दे नुगरा सुपनां नै
जिका दिरावै थाकैलो
अर करावै
बिरथा जातरा ।
***
(7)

कविता लिखैला जीसा

म्हैं कोटगेट सूं
अलेखूं वळा निकळ्यो
जीसा ई निकळ्या हा
पण म्हां नीं लिखी कोई कविता-
कोटगेट री ।
कविता में फगत
कोटगेट कोटगेट रो नांव आवण सूं
नीं बणै कविता-
कोटगेट री ।
किणी कवि सूं
कोटगेट आज तांई नीं बोल्यो-
लिखण सारू कविता-
कोटगेट री ।
जीसा रै लारै
बांटती बगत पातळां
टाळी ही पातळ-
कोटगेट री ।

बीकानेर रै च्यारूं दरवाजां सागै
अबै बंतळ करैला जीसा
बामण नै दियोड़ा
पोथी-पानड़ा अर पेन सूं
स्यात कविता लिखैला जीसा !
***
(8)

दादी दांई दुनिया

आयै दिन
मंदगी मांय अधरझूल
झोटा खावै है- दादी ।
ऐ झोटा
पूरा ईज समझो हणै
पण मन नीं भरै दादी रो !

दादी !
थारो जीवण सूं
क्यूं है- इत्तो लगाव ?
अबै कांई रैयो बाकी
जद कै थारा टाबर ई
उफतग्या है, नाक राखता-राखता
गळी-गवाड रै डर सूं ।

भायला, दादी दांई दुनिया ई
खावै है झोटा ।
***
(9)

मायनो चावूं म्हैं

सूरज चांद री गुड़कती दड़ियां सूं
नीं रीझूंला म्हैं
मयनो चावूं म्हैं
कै शेषनाग रै फण माथै है
का किणी बळद रै सींगां माथै
आ धरती

मायनो चावूं म्हैं
कै म्हारी जड़ां जमी मांय है
का आभै मांय किणी डोर सूं
बंध्योड़ो हूं म्हैं ।

मायनो चावूं म्हैं
कै किणी रिधरोही भटकूंला
का पंख लगा उडूंला आभै मांय
किणी बीजै री आंख सूं

मायनो चावूं म्हैं
कै किणी पुटियै काकै री टांगां माथै है
का किणी किसन री आंगळी माथै
ओ आभो
बिरखा-बादळी का इंदरधनख सूं
नीं रीझूंला म्हैं
मायनो चावूं म्हैं
***
(10)

ओळखतां थकां ई

म्हैं गफल रैयो
थे होकड़ा लगा लगा
रचता रैया
नित नूंवां रास !

म्हनै अळघो राखर सांच सूं
थां साज्या- थांरा मतलब ।

आज म्हैं
थांनै ओळखता थकां ई
थांरा होकड़ा उतारण री ठौड़
होकड़ा लगावण री सोचूं ।
***







Comments

No responses to “नीरज दइया री दस कवितावां”