सांवर दइया री कवितावां

सांवर दइया री कवितावां




अर अचाणचक

आभै में उडतै
पंछी नै देख
        मुळकूं
        हरखूं
        उच्छब मनावूं

……अर अचाणचक
आकळ-बाकळ हो जावूं

अटकै म्हारी आंख
आड़ लेय ऊभो
पारधी निजर आवै
म्हारी सांस
ऊपर री ऊपर
हेठै री हेठै रह जावै !
***

इक्कीसवीं सदी

साव उघाड़ी
साटणिया साथळां
काकड़ियै-सा फाटता बूकीया
          अर ए श्रीफळ
आंख्यां रातीचोळ
जाणै छक’र पी हुवै हथकढ़ी

जठै जावूं
म्हारै गळै पड़ै
आ उफणती नदी
नांव पूछूं तो एक ई उथळो-
        म्हैं इक्कीसवीं सदी !
       म्हैं इक्कीसवीं सदी !!
***

मन री नदी

आंधी
बोळी
गूंगी
छतां लखणा री लाडी
      आ मिजळी सदी

जंगळ सूं जुड़िया
लोभ रा लाडू
     काटां-बाटां-खावां
     थे-म्है-स्सै

कारखानै री सूगली नाळियां
                गिंधावतो पाणी
चिमन्यां सूं निकळतो धूंवो
अमूजतो आभो
धांसतो-खून थूकती हवा

मैला गाभा
मैलो तन
मैली आंख
मैली मन री नदी !
***

ऊंधो हुयोडो रूंख देख’र

म्हारी जड़ां
जमीन में कित्ती ऊंडी है
आ चींतणियो रूंख
         आंधी रै थपेड़ां सूं
         ऊंधो हुयग्यो जमीन माथै

कित्ताक दिन रैवैला
तण्यो म्हारो डील-रूंख ?

नितूकी बाजै
अठै अभाव-आंधी
होळै-होळै कुतरै
             जड़ां नै जीव

अबै
औ गुमान बिरथा
म्हारी जड़ां
जमीन में कित्ती ऊंडी है !
***

धोरां रो धणियाप

म्हारै च्यारूंमेर
धोरा ईं धोरा

धायोड़ां नै लखावै
        सोनै वरणा

भूखां नै
पीळीयै में पड़ियै टाबर-सा
आं धोरां रो धणियाप
म्हारी सांसां माथै

आ तो
आंरी मरजी
रोसै
का पोखै म्हनै !
***

हत्भाग

गूंगो गुड़ रा गीत गावै
बोळियो सरावै

सजी सभा में
पांगळो पग पम्पोळ बोल्यो-
                     म्हैं नाचसूं !

आंधो आगै आयो
बाड़ो बोलतो-
        थांरो कांई ठेको लियोड़ो है
        म्हनै ई देख्ण द्यो !

कळावंत !
काठी झाल थारी कलम नै
***

जायसी री पीड

म्हैं काळो
म्हैं काणो
म्हैं कोझो

थांनै हंसता देखूं तो लखावै
हाल मरियो कोनी
                शेरशाह

म्हैं माटी हो कदै ई
इण गय सूं पैली
जाणता हुवोला थे ई
रचना पड़रूप हुवै सिरजणियै रो

म्हारी कणाई
म्हारी कोजाई
उणियारो है बींरो ई !
***

छळ

लोग कैवै :
तूं जठै दांत देवै
बठै चिणा कोनी देवै
अर जठै चिणा देवै
             बठै दांत

पण म्हनै तो तैं
दांत अर चिणा दोनूं ई दिया

अबै
आ बात न्यारी है
कै आं दांतां सूं
ऐ चिणा चाबीजै कोनी !
***